सभामुख सापकोटाले सेतीदेवी पञ्चकन्या स्कुलबाट गरे मतदान
वैशाख ३०, सिन्धुपाल्चोक । स्थानीय तह निर्वाचन २०७९ अन्तर्गत सभामुख अग्निप्रसाद सापकोटाले सिन्धुपाल्चोकको चौतारा साँगाचोकगढी नगरपालिका–४ कुविण्डेस्थित सेतीदेवी पञ्चकन्या माध्यामिक विद्यालयमा रहेको मतदान केन्द्रमा मतदान गरेको उनका प्रेस संयोजक श्रीधर न्यौपानेले बताए।
स्थानीय तह निर्वाचनमा मदतान गर्न सभामुख अग्निप्रसाद सापकोटा हिजोनै गृहनगर आइपुगेका थिए। उनी चौतारा साँगाचोकगढी नगरपालिका–५ कुविण्डेका मतदाता हुन्। सभामुख सापकोटाले उक्त केन्द्रबाट पहिलो मत खसालेका छन्।
सभामुख सापकोटाका भाइ कृष्णप्रसाद सापकोटा चौतारा नगरमा प्रमुखको उम्मेदवार छन्। उनी माओवादी–एकीकृत समाजवादी गठबन्धनको तर्फबाट उम्मेदवार बनेका हुन्।
