डडेल्धुरामा प्रधानमन्त्री देउवा विजयी
मंसिर ७, काठमाडौँ । प्रधानमन्त्री शेरबहादुर देउवा भारी मतान्तरका साथ विजयी भएका छन्। निर्वाचन आयोगले बुधबार बिहान सार्वजनिक गरेको अन्तिम मतपरिणाम अनुसार उनी १२ हजार ४९२ मतान्तरका साथ सातौं पटक प्रतिनिधिसभा सांसदका रुपमा विजयी भएका हुन्।
प्रधानमन्त्री देउवाले २५ हजार ५३४ मत प्राप्त गरेका छन् भने उनका निकटतम् प्रतिष्पर्धी स्वतन्त्र उम्मेदवार सागर ढकालले १३ हजार ४२ मत ल्याएका छन्।
नेपाली कांग्रेस बीपीका उम्मेदवार कर्णबहादुर मल्ल ७ हजार ५३५ मत ल्याएर तेस्रो भएका छन्।
डडेल्धुराको निर्वाचन अधिकृतको कार्यालले कूल खसेको मत ५१ हजार २०३ मध्ये ३ हजार १८७ मत बदर भएको जनाएको छ। प्रधानमन्त्री देउवा २०४८ सालदेखि लगातार डडेल्धुराबाट निर्वाचन जित्दै आएका छन्।
