चैत १८, मेलबर्न, अष्ट्रेलिया। वेस्ट अष्ट्रेलियाको व्हीटबेल्ट क्षेत्रको आफ्नो घरबाट बालकलाई अपहरण गर्न प्रयास गर्ने व्यक्ति पक्राउ परेका छन्। उनले एक बालकलाई लगिसकेको र अर्को बालकलाई अपहरणको प्रयास गरेको प्रहरीले जानकारी दिएको छ।

ती बालकहरूले नचिनेका ३४ वर्षीय वर्षीय पुरुष शुक्रबार बिहान ४ बजेतिर पर्थबाट १७७ किलोमिटर उत्तरमा रहेको मूराको एउटा घरमा प्रवेश गरेको आरोप लागेको छ। 

७ वर्षीय बालकलाई लगिसकेका उनी १२ वर्षीय अर्को बालकलाई जबरजस्ती घरबाट लैजान फर्किएका थिए। 

तर, १२ वर्षीय बालक उनको पञ्जाबाट छुटेपछि घर गएको र परिवारका सदस्यहरूले यो घटनाबारे प्रहरीलाई जानकारी गराएपछि आरोपित पक्राउ परेको प्रहरीले जानकारी दिएको छ।

प्रहरीले उक्त इलाकामा खोजी गर्दा बिहान ७ बजेपछि सात वर्षीय बालकलाई नजिकैको घरमा फेला पारेको थियो। अहिले पक्राउ परेका व्यक्तिले प्रहरी अनुसन्धानमा सहयोग गरेको बताइएको छ।

दुवै बालकलाई नियमित स्वास्थ्य परीक्षणका लागि अस्पताल लगिएको प्रहरीले जनाएको छ।