माघ ३, मुम्बई । बलिउड अभिनेता शाहरुख खानका लागि सन् २०२३ फलिफाप साबित भयो । तर सन् २०२३ अघि उनका लागि केही समय समस्याग्रस्त बन्यो । उनको व्यक्तिगत जीवनसँगै व्यावसायिक जीवन पनि समस्याले घेरिएको थियो।

शाहरुखको फिल्म ‘जिरो’ सन् २०१८ मा रिलिज भएको थियो । यो फिल्मलाई दर्शकले उल्लेख्य मन पराएनन्। अहिले आएर यो फिल्मको बारेमा नयाँ तथ्यको खुलासा भएको छ। समाचार अनुसार, फिल्मका निर्देशक आनन्द एल रायसँग शाहरुखको फिल्मको सेटमा झगडा भएको थियो। यसको खुलासा स्वयम् आनन्दले गरेका छन्।

यो फिल्म बक्सअफिसमा फ्लप भए पनि फिल्मका केही दृश्य सामाजिक सञ्जालमा निकै भाइरल भएका थिए। ‘फिल्म जिरोलाई लिएर कैयौं पटक शाहरुख र मबीच झडप भएको छ। फिल्ममा शाहरुखले यति धेरै पैसा किन लगाइरहेका छन् भन्ने लाग्थ्यो। एक–एक सीन पाँच पटकसम्म खिचिएको थियो। शाहरुख रिस्क लिने व्यक्ति हुन्। फिल्म ‘जिरो’ शाहरुखको ड्रिम प्रोजेक्टमध्ये एक थियो। फिल्म राम्रो बनाउनका लागि पनि झगडा पथ्र्यो’, आनन्दले भनेका छन्।

यो फिलममा अनुष्का शर्मा र कटरीना कैफको पनि अभिनय थियो। फिल्म ‘जिरो’ फ्लप भएपछि शाहरुखले ठूलो पर्दाबाट लामो ब्रेक लिएका थिए। यसपछि सन् २०२३ मा शाहरुखका तीन फिल्म ‘पठान’, ‘जवान’ र ‘डंकी’ दर्शकमाझ आए। संयोगबस् तीनै फिल्म हिट भए।